Pedalak apurtu
09:30ean hasi zuten ibilbidea txirrindulariek eta lehenengoak, Aitor Rementeria bergararrak, bi ordu eskas behar izan zituen ibilbideko 34 kilometroak egiteko. "Lasterketako lehen zatian Gure Ametsaraino joan eta Hiruerreketatik Dorletara, eta handik herrira etorri dira. Hemen jateko eta edateko zerbait hartu eta Arlabango bidea hartu dute. Aurten ez zegoen lokatzarik, eta ez da erortze larririk egon. Parte-hartzaile bati bizikletako pedalak apurtu zaizkio, baina horixe izan da lasterketako bitxikeria bakarra", azaldu du Altubek.
Txirrindulariei kamiseta bana eta zozketan parte hartzeko zenbaki bana eman dizkiete antolatzaileek. Urdaiazpikoak, likoreak, gaztak eta Jakion enpresako produktuak zozketatu dituzte, besteak beste, herriko frontoian lasterketa amaieran. Lau urdaiazpikoetatik hiru, oñatiarrei tokatu zitzaizkien. Umeek euren zozketa izan zuten.