Azken urteotan aldatu egiten dituzte elizpeko apaingarriak eta aurten Olentzero eta Maridomingi jarriko dituzte danbolina eskuartean dutela gaztainak erretzen. Gurasoek umeak izango dituzte lagun apaintze lanetan bihar (11:00) eta liburutegian egindako eskulantxoei ere egingo diete tokia. Lanak bukatutakoan txistorra jango dute elkartean.
Baserriz baserri kantuan
Gabon egunean, abenduak 24, goizean iritsiko da Olentzero herrira, eta ume eta gurasoekin batera kantuan joango da. Urtero legez autobusa hartzeko asmoa dute (09:00) eta Olaun aldeko baserrietara joko dute lehenengo. Handik Arabako mugaraino joango dira eta bidean dauden baserrietatik pasatu. Eta bukatzeko, Goierri auzoa eta inguruko baserrietara iritsiko dira. Baserri guztietatik pasatu ondoren herrian bertan ere abestuko dute kalez kale.
Zalantza barik, neka-neka eginda bukatuko dute guztiek eta merezitako saria jasoko dute eguerdian: bazkaria, Toki Eder elkartean. Goizean kantuan dabiltzan bitartean hainbat herritarrek gertatutako bazkaria jango dute Gabon giroan.