Flamenkoak eta perkusioak erantzun ona Andramaixetan

Udan ohikoa den moduan festarik festa gabiltza azken asteotan. Oraingo honetan gatzagarrei iritsi zaie txanda. Gatzagan Andramaixak ospatzen dabiltza. Hain justu ere egubakoitz arratsaldean hasi zituzten herriko jaiak etxafuego eta bonba japoniarrekin. Astelehen eta martitzenean ere badago zertaz gozatu.

Arratsaldea lasaia izan zen, baina, iluntze aldera herriko plaza gaztez betetzen hasi zen; egubakoitz gaua gazteen gaua izan zen-eta. Urtero moduan rock kontzertua egin zuten baina, aurten, inoiz baino talde gehiagok jo zuten; bost talde igo ziren oholtza gainera: Arrasateko Dirty Acoustic Brothers eta Aggressive Combat, Aretabaletako The Crackers eta Krisis eta Goierri aldeko The Last Strenght. Hori horrela, goizaldera arte punk-oi! doinuak izan ziren nagusi Gatzagan.

Zapatuan herrikoak ibili ziren batez ere eta jaien bigarren egunean ere iluntze aldera berotu zen giroa. Zo Zomgo perkusio taldeak sekulako giroa ipini zuen Gatzagako kaleetan barrena eta herritar talde polit batek jarraitu zituen dantzan. Gauean, berriz, herri afaria egin zuten. 150 pertsona elkartu ziren herriko plazan eta afalostea Trikizio taldeak girotu zuen.

Gatzdun pintxoek arrakasta

Domekan jende asko ibili zen. Goizeko mendi bizikleta zeharkaldiaren aitzakiarekin jende ugari hurbildu zen Gatzagara. Asko eta asko gatz museoraino gerturatu ziren; izan ere, Sorginak emakume taldeak, Soran Etxea hotelaren laguntzarekin egindako gatzdun pintxoak eskaini zituen. Sekulako arrakasta izan zuten horiek ere; benetako gutiziak. 
Eguerdi partean flamenko doinuak iritsi ziren. Lapulga eta konpainia taldeak sekulako arrakasta izan zuten. Askoa dantzariak flamenkoarekiko duen pasioa ikusleenganaino iristea lortu zuen. Arratsaldean, gero, pilota partiduak egon ziren.

Astelehen eta martitzenean, gehiago

Baina festa ez da amaitu oraindik, ez da gutxiago ere. Astelehenean, hilak 7, arratsaldean umeendako jolasak egongo dira eta bederatziurrena dorletan Eskoriatzako abesbatzarekin. Martitzenean, berriz, Otxandiokoei ongietorria egingo diete, 11:00etan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.