Behin iragarkia argitaratuta zortzi eguneko epea dute interesatuek lehiaketari erreklamazioak aurkezteko eta 20 egun izango dituzte oinarriak aztertu eta eskaerak aurkezteko. Horretarako, Bideberri mankomunitateak Antzuolan duen bulegora joan behar dute, Herriko Plazako 8. atartean.
Bi urterako zerbitzua
Etxerik etxeko zerbitzua emango duen enpresa bi urterako hartuko du Bideberrik, eta kontratua luzatzeko aukera egongo da lau urte arte. Arreta emateko ordu normalaren kostua 18,07 eurotan jarri du mankomunitateak eta jaiegunetako arretarena 21,69 eurotan. Proposamen horiek beherantz hobetu beharko dituzte interesatutako enpresek.
Laguntza pertsonala –norberaren garbitasuna…– eta etxerako lanak egiteko laguntza –bazkaria, garbitasun lanak…– eskainiko ditu zerbitzua hartzen duenak. Gatzagan GSR enpresak eman du azken urteotan.