Antzuolak, Elgetak eta Leintz Gatzagak osatuta daukaten Bideberri mankomunitateak –Gizarte Zerbitzuei dagokien gaiak kudeatzeko– iaz abian jarritako prozesuari jarraipena emango diote eta plan horren diseinua egingo dute. Hiru herrietan landuko dute parte-hartzean oinarrituta dagoen sistema bitartez eta herritarren iritziak jaso gura dituzte egunotan. Horregatik, batzarrak egingo dituzte eta Gatzagan martitzenean izango da, hilak 10, udaletxeko osoko bilkuren aretoan (18:00-20:00).
Lantaldeak osatu
Elhuyar Aholkularitza dabil bideratzen Berdintasunaren Plana. Eta antolatutako batzarraren helburua da emakumeen eta gizonen arteko aukera berdintasunen inguruan hausnartzea herriko ordezkari politikoek, udal teknikariek eta herritarrek. Gainera, egungo egoera hobetzeko ekintzak proposatzeko aukera izango dute guztiek. Lehenengo batzar horren ostean lantaldeak osatuko dituzte eta beste bi batzar egingo dituzte gero.