Udal agintariek, herriko elkarte eta taldeetako ordezkariek eta herritarrek osatzen dute batzorde orokorra, eta aldiro izaten dituzte batzarrak, ahal dela hilero. Alkatea da batzorde horretako burua eta deialdia egiten duena.
Azken proiektuen berri ematen die alkateak batzordeko kideei, eta oraingoan iraileko Andramaixa jaietako egitaraua iragarriko diete. Herriko elkarteek, ostera, dituzten ekimenak, arazoak eta kezkak jartzen dituzte mahai gainean. Elkarteetako ordezkariek zuzenean jasotzen dute Udalaren gonbidapena: Gurel guraso elkarteak, Sorginak emakume taldeak, Toki Eder erretiratuenak, txirrindularitza batzordeak eta pilota taldeak. Baserritarrak eta tabernariak, ostera, ordezkari barik daude, ez dutelako elkarterik. Eusebio Villar alkateak eskatu die ordezkariak izendatzeko eta batzarretara etortzeko: "Batzorde hori delako kezkatzen dituzten gaiak azaltzeko tokia". Herritarrek ere parte har dezakete batzarrean.