Arlaban gaineko plan berezia aurrera eroateko ur hornikuntzaren arazoa konpondu behar da lehenengo, eta egindako azterketek depositu baten beharra dagoela adierazi dute. Hala, onartutako diru-laguntzarekin depositu berria egin Gatzagain inguruan, behean dagoen depositutik ura bonbeatu gora eta saneamendu hodiak sartuko dituzte.
Proiektu horren inbertsioa 618.000 eurokoa da eta Aldundiak 450.000 euro inguruko diru-laguntza emango du.
Plan berezia onartzeko
Arlaban gaineko planak lur eremu hori arautu gura du, eta turismo eta aisialdiarekin zerikusia duten kontuetarako egokitu. Orain herrian dagoen Jakion enpresak ere bertan izan dezake kokalekua, handitze prozesu batek eskatuta. Hori guztia egin baino lehen, eta era berean, Gaztainuzketako mendi etxeen beharrak asetzeko ur hornidura bermatu beharra daukate. Hori egindakoan orain dela hainbat urte iragarritako plan berezia onartuko dute.
Aldundiak aginduta, Etorlurrek, hornikuntza eta saneamendu proiektuaren inbertsio plana egingo du. Era berean, plan horietan aurreikusitako inbertsioak gauzatuko ditu.
Bigarren proiektua
Landagipuzkoa32 egitasmoak Gatzagan finantzatutako bigarren proiektua da hori. Pilotalekuaren estalkia berritzea eta ixtea onartu zuelako orain hilabete batzuk. Lan horiek herriko jaiak pasatutakoan hasteko asmoa daukate.