Abereak mendian ibiltzea arautzen duen ordenantzaren aldaketak ikusgai

Astelehenaz gero, maiatzak 5, daude ikusgai abereak mendian ibiltzea arautzen duen ordenantzaren aldaketak. Apirilaren 10ean egindako osoko bilkuran onartu zituen udalbatzak, eta asteleheneko Gipuzkoako Aldizkari Ofizialean argitaratu zuten jakinarazpena. Orain hilabeteko epea daukate interesatuek erreklamazioak aurkezteko. Udaletxera bideratu behar dituzte.

Aldaketok bertako baserritarrekin adostu zituen Udalak. Hala ere, erreklamazioak egon, egon daitezkeela uste du Eusebio Villar alkateak baserritar ez direnek ere badituztelako abereak. Aldaketarik handiena, gainera, bizitokiarekin dauka zerikusia, hau da, Gatzagan erroldatuta daudenek eta bertan bizi direnek izango dute lehentasuna abereak mendira eroateko baimenak lortzerakoan: "Baina lekua egonez gero mendian, Gatzagan bizi ez direnek ere eroan ahal izango dituzte", dio alkateak. Baimen eskaerak udaletxean egin behar dituzte azaroaren 30a baino lehen, eta Udalak Aldundiari bideratuko dizkio: "Azkenean Aldundia da baimenak ematen dituena, eta ez dakit lekuarekin arazorik izaten den. Nik ezetz esango nuke, izan ere, gero eta abere gutxiago ditugu; behorrak eta behiak oraindik badituzte baserrietan, baina ardiak esaterako, gutxitzen dabiltza", argitu digu alkateak.


Maiatzaren 1az gero abereak mendira eroan ditzakete baimena duten jabeek. Behiek azaroaren 30a arte egon ahal izango dute, eta behorrek, ardiek eta ahuntzek otsailaren 29a arte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.