Urteroko lehia
Ama Birjina egunean, egubakoitzean, etorri ziren urtero bezala otxandiarrak herrira. Goizean egin zieten ongietorria, 11:30ak aldera. Bazkalostean, askotariko jokoetan euren abilezia erakutsi zuten bi herrietako lagunek. Gauean, rock kontzertuak egon ziren herriko plazan eta goizaldera arte iraun zuten.
Zapatua izan zen jaietako egunik indartsuena. Goizeko 05etan adardunak eta poney-ak izan ziren goiztiarrentzat. Gaupasa egin zutenak zein beste zaleak elkartu ziren herriko kaleetan eta istripu larririk ez izan arren, egon zen etxera susto ederrarekin joan zenik. 11:30ean berriro atera zituzten zezen txiki eta poney-ak eta gaztetxoak oso gustura ibili ziren.
Herri kirol eta trialsin erakustaldia ere egin zuten zapatuan. Jende asko batu zen bi ekitaldietan. Arratsaldean, Toki Eder elkartean mus txapelketa jokatu zen eta plazan gaztetxoentzako jolasparkea jarri zuten. Andramaixetako egun nagusia borobiltzeko, gauean II. herri afaria egin zuten herritarrek Udal Pilotalekuan. Iaz egin zuten afaria lehengo aldiz eta izandako arrakasta ikusita, aurten ere egin dute. 130 pertsona inguru bertaratu ziren. Afalostean, Drindots taldearekin dantzaldia egon zen herriko plazan.
Mendi bizikleta eta pilota jaiak agurtzeko
Jaiak amaitzeko, IV. mendiko bizikleta zeharkaldia egin zuten atzo goizean, ume eta helduen kategorietan. Ondoren, herri poteoa egin zuten animatutako guztiek eta arratsaldean pilota partiduak egon ziren.
Jaiei amaiera emateko, Oñatiko Gora taldearekin dantzaldia egon zen arratsaldean. Horrekin esan zieten agur Gatzagako herritarrek aurtengo jaiei. Datorren urtean gehiago!