Asteburuko ospakizunek inoiz baino jende gehiago erakarri zuten Gatzagako Andramari jaietara. Egubakoitzean hasi ziren giroa berotzen, Raflen ezkila emanaldiarekin, arratsaldeko seietan. Ordu berean etxafuegoak, bonba japoniarrak eta herriko trikitilarien emanaldia egon ziren, giroa berotzen hasteko. Dorletako Santutegian bederatziurrena entzun ondoren, txikiteoa egin zuten gatzagarrek, herriko trikitilariek lagunduta.
Gauean, ibar osotik etorritako 150 gazte baino gehiago bildu ziren Herriko Plazan rock kontzertua entzuteko. Never Surrender eta Enboskada taldeek plaza jendez bete zuten; jarraian, Kontamina Ke Algo Keda eta Golpe de Estado taldeek jo zuten, aurrekoek baino jende gutxiagorekin, baina primerako giroan.
Ume eta gazteen eguna
Zapatuan gaztetxoak izan ziren protagonista. Goizetik hasi ziren bonba japoniarrekin eta Gorritik girotutako jolasekin. Eguerdiko herri bazkarian 110 pertsona elkartu ziren bildots errea eta saiheskiak dastatzeko. Eguraldiak eta gatzagarren umore onak lagunduta, jende ugari ibili zen egun osoan, eta Trikizioren dantzaldiarekin bukatu zuten eguna.
Kirol aukera zabala
Domekan kirol aukera zabala izan zen Gatzagan. Goizean txirrindularitza lasterketa izan zen, Dorletako txirrindulari elkarteak antolatua. Proba honetan Gorka Amuriza igorrearra nagusitu zen. Arratsaldean, herriko gazteen eta nagusien arteko pilota partiduak jokatu ziren. Gazteetan Zaramaga izan zen garaile, Oiaga-Jaio bikotea, nagusietan. Asteburua amaitzeko, Dorletako Santutegian bederatziurrena ospatu zuten, eta jarraian dantzaldia izan zen Herriko Plazan, Kaixo taldearen eskutik.
Eguaztenean bukatuko dira Andramari jaiak, gatzagarrek otxandiarren kontra egingo duten lehiarekin. Dena den, horren aurretik, martitzenean ere egongo da girorik Gatzagan.