Tabernetan euskaraz eskatzera xaxatu dituzte herritarrak Eskoriatzan

Julen Murua Mesonero

Zuk eskatu, nik ulertzen dut kanpaina, Urrestilla tabernan.

Zuk eskatu, nik ulertzen dut kanpainaren baitan, bi aktore ibili dira Fernando Eskoriatza plazako tabernetako kontsumitzaileak xaxatzen, euskaraz eskatu dezaten.

Debagoieneko Mankomunitateak, Gipuzkoako Foru Aldundiak eta bailarako Udalek abiatutako ekimena da eta herritarrek tabernetan euskaraz eskatzea du helburu. Bi aktore ibili ziren atzo helburu hori lortzeko lanean, tabernetan zeuden eskoriatzarrak euskaraz eskatzera animatuz. "Tabernetan hiztegi txiki batzuk daude testuinguru horretan erabiltzen diren hitz ohikoenekin, kontsumitzaileak eta zerbitzariak euskaraz hitz egitera bultzatzeko helburuarekin. Espero dugu, kanpainak abenduaren 15era arte iraungo badu ere, aurrerantzean herritarrek tabernan euskaraz hitz egitea; izan ere, tabernak dira harremantzeko erabiltzen ditugun tokietako bat", adierazi zuten aktoreek.

Herritarrek kanpainarekin bat

Hainbat herritarrek adierazi zuten euren ohitura "euskaraz eskatzea" dela, eta kanpaina egon edo ez, beti horrela egingo dutela. Hala ere, "kanpaina polita" iruditu zaie askori eta taberna giroko "berba azkarrak ikastera bultzatzea" garrantzitsua iruditu zaie. Aurreiritziekin lotutako zerbait dela diote hainbatek: "Erdaraz eskatzen dugu batzuetan, pentsatuaz zerbitzariak euskaraz ez dakiela. Sorpresa polita izaten da zerbitzariak euskaraz ez dakiela pentsatu eta euskaraz entzutea".

Badaude euskaraz ez dakiten zerbitzariak, baina horiek ere adierazten dute "tabernari lotutako hainbat hitz eta esaldi" ezagutzen dituztela eta "eskertu" egiten dutela eurei euskaraz hitz egitea.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Batu zaitez Goiena albisteen kanalera.

TELEGRAM: Batu zaitez GoienaAlbisteak kanalera.


Harpidetza aukera guztiak