Irakasle Eskolako lehen belaunaldiko ikasleak berriro elkartu dira, 50 urteren ostean

Imanol Beloki Unamuno

Irakasle Eskolako lehen belaunaldiko ikasleak Eskoriatzan.

Azaroaren 7an, Eskoriatzan, Irakasle Eskolako lehen ikasle haiek berriro elkartu ziren, ikasketen hasieratik 50 urte igaro direla ospatzeko.

"Denborak ez ditu ezabatu ez ikasitakoa, ez bizitakoa, ezta elkarrekin eraikitako loturak ere. Izan ere, 50 urte igaro dira, baina badira denboraren gainetik irauten duten loturak", azaldu du Resu Abasolok, bertan batutako guztien izenean.

Eskoriatza plazan egin zuten topo, ilusio handiz. "Elkar ikusi, berriz ezagutu, oroitzapenak partekatu, hitz egin, barre egin eta urte hauetan guztietan sortutako distantzia laburtzeko aukera izan genuen. Ondoren, aperitiboaren bueltan, lehenengo ikasgela hura gogorarazteko oroigarri bat elkarbanatu genuen. Eta, eguna borobiltzeko, elkarrekin bazkaldu genuen, oroitzapenak eta bizipenak partekatzen jarraitzeko. 39 izan ginen orduan; gaur, 35 gara".

Premiazko prestaketa 

1976an sortu zen Eskoriatzako Irakasle Eskola, Debagoieneko irakaskuntza-kooperatibak biltzen zituen Hezibide Elkartearen ekimenez. Garai hartan, ikastetxeek euskarazko irakasle tituludunen premia handia zuten, eta behar horri erantzuteko sortu zuten eskola. Horrela hasi zen lehen ikasleen belaunaldiaren ibilbidea, hasieran Salamancako Unibertsitate Pontifizioaren ikasgela gisa.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Batu zaitez Goiena albisteen kanalera.

TELEGRAM: Batu zaitez GoienaAlbisteak kanalera.


Harpidetza aukera guztiak