Irailaren 26ko Eskoriatzako kontrol hartan antzemandako materiala zein zen ikusita, eta identifikatutako lagunek aurrekariak zituztenez, Ertzaintzak ikerketa hasi zuen, eta, horren ondorioz, Auzitegi Nazionalarekin harremanetan jartzeko bideak ireki zituen, kontuan hartuta gertakariak ustezko terrorismo-delitua izan zitezkeela. Hurrengo egunetan, Ertzaintzaren Inteligentzia Bulego Nagusiak aurrera egin du ikerketarekin, eta hainbat bilera egin dituzte Auzitegi Nazionaleko agintari judizialekin.
Azken egunotan, ikerketak eta Auzitegi Nazionalarekin izandako harremanek "aurrerapauso nabarmenak" izan dituztela adieraz dute ohar bidez. Atzo, hilak 17, ikertutako pertsonetako bi Irungo ertzain-etxera joan ziren, abokatuarekin batera, eta une horretan atxilotu egin zituzten, ikerketen garapena eta Auzitegi Nazionalarekin egindako kudeaketen ondorioz. Atxilotuak 34 urteko gizon bat eta 22 urteko emakume bat dira, biak espainiar nazionalitatekoak, eta ustezko terrorismo delitu batengatik ikertuak.
Bi atxilotuei deklarazioa hartu eta beharrezko ikerketa-eginbideak egin ondoren, atxilotutako bi pertsonak Auzitegi Nazionalaren esku jarriko dituzte lehenbailehen. Bien bitartean, Ertzaintzak ikertzen jarraitzen du.