"Ziklo bakoitzean lanketa ezberdinak egin ditugu, guztiok desberdinak garela ikusarazteko, bakoitzak gaitasun ezberdinak ditugula jabetzeko eta pertsona bakoitzak laguntza eta behar desberdinak izan ditzakeela ulertzeko", azaldu dute Luis Ezeiza Herri Eskolatik. Hala, mailaka, hainbat balio landu dituzte, besteak beste: adiskidetasuna, enpatia, elkartasuna, errespetua, berdintasuna eta erantzukizuna.
'Tximeleta' osatuta
Urriaren 6an, 11:30ean, Lehen Hezkuntzako ikasle eta irakasleok patioan elkartu ziren, eta aurrez landutako marrazkiekin tximeleta handi bat osatu zuten, bertako Tximeleta gelako lagunekin batera. Guztien artean sortutako tximeletak aniztasuna, elkartasuna eta inklusioa irudikatu zituen.
Haur Hezkuntzan, berriz, Tximeleten lorategia osatu dute, bakoitzaren berezitasuna eta edertasuna balioan jarriz.
"Egun berezi honen bidez, argi utzi nahi izan dugu desberdinak izan arren, denok dugula gure lekua eta ekarpena egiteko zerbait. Elkar ezagutuz, ulertuz eta zainduz, guztiontzako eskola inklusiboagoa eraikitzen jarraituko dugu", adierazi dute Luis Ezeizatik.