Aurtengo leloa Txirri, txirri izango da. Txosna Batzordeko kide Goizane Zubizarretaren esanetan, sorreratik pixkanaka eraiki eta sendotu da Eskoriatzako Txosna Batzordea, eta etorkizunean ere bide horretan jarraitzeko nahia islatu nahi izan dute aurtengo leloan.
Antolakuntza lanak, gainera, gero eta lehenago hasi behar izaten dituztela adierazi du. Musika taldeak lotzeko zailtasunak handitzen ari direla eta, aurten azaro-abendu inguruan ekin zioten egitaraua prestatzeari. Hala ere, programazioa ixtea ez dela erraza izan azaldu du, azken unera arte hainbat xehetasun lotzen aritu baitira. Zubizarretaren arabera, beste herri batzuetan aurrekontu handiagoak dituzten arren, Eskoriatzako errealitatea bestelakoa da, eta urtero ahalegin berezia egin behar izaten dute baliabideak kudeatzeko. Gainera, aurtengo egutegia kontuan hartuta, ez dute uste inbertsio handiak egiteko urterik egokiena denik. Horregatik, azken urteetako egitura eta dinamika nagusiei eustea erabaki dute.
Era berean, Txosna Batzordetik urte osoan egiten den lan kolektiboaren garrantzia azpimarratu du Zubizarretak. Adierazi duenez, jaiak "urte osoko asanblada eta auzolanetan egindako lanaren emaitza" dira, eta herriko gazteei dei egin die lotsarik gabe batzordearen asanbladetara joateko eta parte hartzeko. Azken finean, Zubizarretaren esanetan, Eskoriatzako jaiek ez dute aparteko osagairik behar arrakastatsuak izateko: herritarren parte-hartzeak eta giro onak egiten dituzte jaiak berezi.
XIII. Bandera altxatzea
XIII. Banderari dagokionez, aurten ere batzordeko talde batek antolatu ditu, eta izen ematea egunean bertan izango da; horrenbestez, eguna heldu arte ez dago jakiterik zein jolas izango diren, ezta parte-hartzaile kopurua ere.