"Harrituta geratu gara familiek erakutsitako gogoarekin, eta baita herritarrek emandako erantzunarekin ere", adierazi du. Enbaxadore lanetan aritu diren familiak euren herrialdeetako jantziekin etorri dira, eta jatekoa eta informazioa ipini dituzte hurbildu direnen eskura. Luis Ezeizako komunitatea osatzen dutenez harago, herritar ugarik erakutsi dute horiekiko interesa.
Folkloretik harago
Kulturartekotasuna kontu folkloriko batean soilik gera ez dadin, hainbat ekintza egin dituzte. Jolas kooperatiboa izan da horietako bat: hamasei herrialdeetako bitxikeriei buruzko galderak jarri dituzte mahai gainean, egoki erantzun ahala puzzle-piezak lortu eta guztiekin mural bat osatzeko; Mundutik Eskoriatzara irakur zitekeen bertan.
Udalari erronka
Munduko mapa bat ere ipini dute, gaurko azokan ordezkatuta egon diren herrialdeak bertan kokatzeko eta horietako bakoitzetik Eskoriatzara dagoen distantzia erakusteko. Eta anekdota ere utzi du bigarren ekimen horrek, gizonezko brasildar batek bere herrialdea ageri ez zela esaterakoan. Horregatik, hain justu ere, udalari erronka luzatu dio Gomez de Segurak: "Polita litzateke, aurrera begira, Aniztasun Eguna herri osora zabaltzea, gure eskolan askotariko herrialdeetako familiak dauden arren, badirelako komunitate horretan ordezkatuta ez dauden beste toki batzuetako bizilagunak Eskoriatzan".
Dantzan bukatu dute goiza, Errumaniako eta Euskal Herriko dantza banarekin.