Urdelardero eguna giro onean ospatu zuten gaztetxoek; zapatua, ordea, euripean igaro behar izan zuten eskoriatzarrek. Egoerari aurre egiteko, Udalak Joseba Iñurrategi pilotalekua ireki zuen, batez ere mozorro-desfile lehiaketan parte hartu nahi zutenak bertan elkartzeko. Ondoren, ia 600 lagun bildu ziren herri-bazkarian, Manuel Muñoz kiroldegian. Bazkalostean, frontoiko ateak berriz ireki zituzten, eta txikienek puzgarrietan gozatzeko aukera izan zuten.
Mozorro desfile-lehiaketa
Pilotalekuan elkartu ziren lehenik mozorro desfile-lehiaketan parte hartu nahi zutenak. Han, bira bat eman zuten, eta herritarrek harmailetatik jarraitu ahal izan zuten ekitaldia. Euria apur bat baretu zenean, desfilean parte hartu zutenek plazarainoko bidea egin zuten, eta Udalak goizeko lehenengo orduan jakinarazi moduan, ez zen bertan behera geratu lehiaketa.
Sari banaketan hainbat kategoria eta adin-tartetako sariak banatu ziren: 80 euroko lau sari eta 160 euroko hiru sari, baita 100 euroko bi sari ere. 16 urtetik beherakoen kategorian, honakoak izan ziren saridunak: Mito Aroa-Zetak (Originaltasuna), Formula 1 (Animazioa) eta Eskiadorak (Muntaia) eta sari sorpresa (Bakeroak). 16 urtetik gorakoen kategorian honakoak izan ziren saridunak: Villa Intxaurtueta eta Villa Aranburuzabala (Originaltasuna), Artaldea (Animazioa), Merkogoiena (Muntaia), Matriuskak (Banaka edo binakakoan) eta Caravana del amor (sari sorpresa). Adin askotarikoen kategorian, berriz, Esko-prix taldeak 160 euroko saria jaso zuen.
Kukumarruak eta dantzak
Aratuste-martitzenean, berriz, herriko ikastetxeetako haurrak kalejiran kiroldegira joan ziren, eta inauterietako ekitaldia egin zuten bertan. Soinean euskal inauterietako jantzi ezberdinak jantzita zituztela egin zuten dantzan. Arratsaldean, berriz, mozorroek eta pertsonaia ezberdinek hartu zituzten kaleak, eta kalejiran, Fernando Plazarako bidea egin zuten Aratusteei agurra emateko. Horretarako, inauterietako dantzak egin zituzten: Martxa, Kontradantza, Dantzaluze, Baztango zortzikoa, Buhamiak, Momotxorro, Nasteborraste eta Fandago arin arina.