Bidesaritik igarotzeko teknologiaren, automatizazioaren eta arintasunaren aldeko apustuari esker, joan-etorri "erosoagoak" eta "azkarragoak" eskaini ahal izango dira, eta, esparru horretan, Bidegi foru sozietateak Eskoriatzako estazioaren berrikuntza integralerako obrak esleitu ditu, AP-1ean, 1,2 milioi euroko inbertsioarekin eta hamabi hilabeteko exekuzio epearekin. Aurreikusita dago lanak martxotik apirilera bitartean hastea.
Gaur egungo ordainlekuak lau sarrera-bide eta beste lau irteera-bide ditu, eta eraberritze integralak, lurraldeko beste estazio batzuetan ezarrita dagoenaren antzekoa, makina automatikoak izango ditu, era guztietako ordainketak, teleordainketa bide berriak eta contactless sistema erabili ahal izateko. Era berean, urrutiko gainbegiratze eta kontrol sistema operatibo bat ere gaituko da, 24 orduz kudeaketa optimizatzeko eta instalazioak funtzionatzeko langileak era presentzialean egoteko beharrik ez duena.
Ordainlekuaren ohiko funtzionamendua eten gabe egingo dira obrak. Horretarako, faseka gauzatuko dira, eta une bakoitzean behar diren desbideratzeak edo errei-aldaketak behar bezala seinaleztatuko dira, trafikoari ahalik eta gutxien eragiteko.
Eskoriatzako jarduketak jarraipena ematen dio Bidegi lurraldeko hainbat tokitan, hala nola Irunen, Orion, Zarautzen eta Oiartzunen, egiten ari den kobrantza-estazioen modernizazio progresiboaren prozesuari.