Eskoriatzako Zaldibar aretoa bete egin dute euskal motorzaleek. Izan ere, gaur eguerdian, bertan banatu dira Euskadiko Txapelketaren kategoria eta modalitate ia guztietako sariak. 150 sari banatu dituzte guztira; motoziklismo federazioko presidenteak azaldu duenez, ahalik gidari gehienak aitortzea izan delako helburua. "Kategoria eta sari asko izan dira ahalik eta gidari gehienek urte honetako oroitzapen on bat izateko".
Sari banaketa 12:00etan hasi da, eta Gonzalezek gidatuta, federazioko kideez gain, sariak banatzen izan dira Edorta Zubizarreta Eskoriatzako alkatea eta Mikel Luengo Udaleko Ingurumen zinegotzia. Amaitu ondoren, ekitaldira bertaratu direnek mokadu bat hartzeko aukera izan dute.
Moto-cross modalitatean lehiatzen dira Enaitz eta Aratz Testa. Enaitzek, anaia nagusienak, aitortza jaso du Euskadiko Txapelketan mx2 kategoriako bigarren postua eskuratzeagatik. Aratzen kasuan, saritua izan da junior mx2 kategoriako lehen postua irabazi ondoren.
Testa anaiak, etxean
Gaurkoan, sari banaketa etxetik gertu izan dute Testa anaiek. "Haien aitak esan zidan ea axola zitzaigun sari banaketa ekitaldia Eskoriatzara ekartzea, eta, gure partetik ez zegoen inongo arazorik. Hala, Udalak dena oso erraz utzi digu ekitaldia egiteko, eta hemen lan egitea oso erosoa izan da guretzako", adierazi du Gonzalezek. Ekitaldia etxean egitea "berezia" izan dela azpimarratu dute Testa anaiek.
Denboraldiari dagokionez, "konforme" daude eskoriatzarrak Euskadiko Txapelketan egindako lanarengatik. Eta, aurrera begira, otsailean hasiko da Espainiako Txapelketan "maila onean" aritzea izango dute helburu.
Munduko txapelduna, euskalduna
Aurten, Beñat Fernandez gidari andoaindarra munduko txapeldun izan da abiadura modalitateko SS 300 kategorian. Lorpen hura "garrantzia handikoa" izan dela azpimarratu dute ekitaldian, izan ere, Euskadiko Motoziklismo Federazioak munduko txapeldun bat daukan lehen aldia izan da.
Fernandez ezin izan da ekitaldira bertaratu, baina, hala ere, haren lorpenari aitortza egin diote ekitaldian. “Harrotzeko zerbait da munduko txapelketa irabazi duen euskal lizentziadun pilotu bat izatea”, nabarmendu du federazioko presidenteak.