Azaroaren 29an, zapatua, ospatuko dute Euskararen Eguna Eskoriatzan, eta, Udalak antolatuta, euskarazko festa giroa izango da nagusi Fernando Eskoriatza plazan, musika, herri kirolak eta herri-bazkaria protagonista direla.
13:00etan hasiko da egitaraua eta horren ardura izango dute Eskoriatzako Hankamotx bertso eskolakoek. Izan ere, emanaldia egingo dute bertso eskolako haurrek, hainbat bertso eginez. Ondoren, Arabako Harri Eskolako kirolariek herri kirol erakustaldia egingo dute, eta honako hauek batuko dira kirol-saioan: Eider Garcia Durana, Jon Marijuan Sagasti, Sara Jimenez de Aberasturi, Maite de Felipe eta Julen Diez.
Bazkaria, karpa barruan
Azken urteotan moduan, herri bazkaria Fernando Eskoriatza plazan egingo da, 15:00etan. Iaz, kantu bazkari formatuan egin zuten eta Leire Lezeta eta Dorleta Ezeiza musikari eskoriatzarrak izan ziren zuzeneko musika eskaintzen. Aurten, berriz, Txomin Illarramendi, Egoitz San Migel eta Miren Zubillaga trikitilariak izango dira bazkalostea girotzen.
Tapia eta Leturia Band
Eguneko ekintza nagusia Fernando Eskoriatza plazako musika emanaldia izango da. Izan ere, 20:00etan, Tapia Eta Leturia Band taldea izango da oholtza gainean, trikiti doinuak ardatz, kontzertua ematen. Ostean, eguna borobiltzeko, DJ Putzu bilbotarrak Inkernu girotuko du, 20:00etan.
Abenduaren 3ko ekintzak
Zapatuan izango dira ekintza nagusiak, baina Euskararen Nazioarteko Eguna abenduaren 3an ospatuko da, eta, eguaztena izanda, ez dira zapatuan besteko ekintzak izango. 17:00etan buruhandiak aterako dira, herriko txikien gozamenerako; 17:30ean, berriz, txokolate-jana egongo da, eta, eguna amaitzeko, 18:30ean, dantza-jauziak egingo dituzte Gorosarri Dantza Taldekoek.