"Non daude izarra? Zer gertatu da zeruarekin? Lapurtu egin al digute?". Oso kezkatuta iritsi ziren Porrotx, Marimotots, Pupu eta Lore, atzo, Eskoriatzara. Ingurua behatzea eta galderak egitea beti da abentura handien abiapunturik onena, eta horrela izan da honakoan ere.
Birtxi farozainaren laguntzaz –Aranzadi astronomia saileko dibulgatzaile Virginia Garcia– urdin infinitura abiatu ziren guztiak –pailazoak zein publikoa–. Izarren bila irten ziren eta unibertsoak dituen sekretu askoren berri izan zuten.
Pailazoek ohikoa duten diskurtso dibertigarri eta hezitzailearekin eta abesti berriak entzun eta dantzatzeko aukerarekin, argi kutsadura, pantailen erabilera, unibertsoaren altxorrak eta natura zaintzearen garrantzia izan zituzten aztergai.
Katxiporretako lagunak estreinatu berri duten ikuskizuna da Zerua lapurtu dute. Bezperan Asteasun estreinatua, bigarren emanaldia izan zen Eskoriatzakoa.