Aurten, gainera, beldur harrapakarixen inguruko ipuina sortu dute Dorleta Kortazar ipuin kontalari eta Olaia Benito ilustratzaile eskoriatzarrek, haurrei pertsonaia berri hauek ezagutzen laguntzeko. Beldi izena du ipuinak, eta izen bereko protagonistak beldur harrapakari gisa bizitakoak kontatzen ditu. Martitzenean bibliotekan egin zen lehenengo kontakizuna, eta jendetza batu zen: "Ipuina, batez ere, ikastetxeetan lantzeko material gisa sortu da. Proiektua bizirik dago oraindik, ez da produktu amaitu bat. Etorkizunean eraldatu egin daiteke. Horregatik, oraingoz, ez dugu online eskuragarri jarriko. Ikastetxeen ekarpenak eta abar kontuan izanda material horren inguruan lanean jarraituko dugu", adierazi du Maider Errastik, Eskoriatzako Udaleko Gazteria teknikariak.
Prestaketa lanak
Gaba Baltza ikastetxeekin eta herriko eragileekin batera antolatzen den eguna da; hala, martitzeneko ipuin kontaketaren ondoren, honako hauek izango dira Eskoriatzako Udalaren programazioaren barruan: astelehenean, arropa prestaketa tailerra egingo da Tortolis ludotekan, 16:45ean eta 18:00etan, bi txandatan. Bertan, Gaba Baltzerako mozorroak prestatuko dituzte etxeko arropa zaharrekin.
Urriaren 31n, berriz, goizean zehar herriko ikastetxeek plaza apainduko dute azken asteetan egin dituzten apaingarriekin. Eta arratsaldean, gaztaina erreak egingo dituzte, plazan. 18:00etan, ginkana beldurgarria egingo da 6 eta 12 urte bitarteko haurrentzako. Ordu berean, Beldur etxea izango da gaztelekuan, eta ihes gela egiteko aukera izango dute herriko nerabeek.
Plazako ekitaldia, aldiz, 19:00etan izango da. Arratsaldean zehar, norbere beldurrak idazteko edo marrazteko mahaia egongo da. Eta bertso-eskolakoen deia jasotakoan, beldur harrapakarixek denen beldurrak batu, eta sutan erreko dituzte. Beldur harrapakarixek dantzarien laguntza izango dute beldur-erretze erritua betetzeko. Festa amaitzeko, zezensuzkoa arituko da, plaza parean.