Egun osoko jaia izango da, eta egitaraua 13:00etan irekiko du Elen’s River Dixieland Band taldeak –New Orleanseko doinu dantzagarrien bitartez eta inprobisazioa oinarri, erritmo bizi eta alaiak eskainiko dituzte–; gero, 18:30etan, berriz, Eibarko Latuna Bando eta Eskoriatzako Ad Libitum txarangak arituko dira.
Musika kalera ateratzeko asmoz
Antolakuntza lanetan Ad Libitum Musika Elkarteko kideak aritu dira, Eskoriatzako Udalaren zein tokiko hainbat tabernen laguntzarekin. Hala, bigarren edizio honetan parte hartuko duten talde guztiak herriko kaleetan zehar arituko dira musikaz girotzen, eta, helburua honakoa dela adierazi dute Ad Libitum musika elkarteko antolatzaileek: "Eskoriatzako kaleak soinu, erritmo eta kolorez betetzea nahi dugu. Helburua argia da: musika kalera atera, parte-hartzea sustatu eta kultura bizia ospatzea".