Eskoriatzako Udal Gobernuak 2026. urterako Ordenantza Fiskalak aldatzeko hasierako onarpena jarri zuen mahai-gainean, egueneko osoko bilkuran. Udal Gobernuko baiezko botoekin eta EAJren ezezko botoekin onartuak geratu ziren Ordenantza Fiskalak.
Edorta Zubizarretak, Eskoriatzako alkateak: "Igoera orokorra 2,7koa da zerga eta tasa gehienetan; zaborraren tasa, berriz, 0,54 igotzen da, soilik. Iazko argudio berdinarekin jarraituz planteatutako igoera da honakoa. Izan ere, Debagoieneko Mankomunitateko txostenaren arabera egiten da. Iaz igoera nabarmena egin behar izan genuen, eta, aurten pixka bat bakarrik igo behar izan dugu".
Oposizioak ezezko botoa
Mankomunitateko datuak ez direla garbiak adierazi zuten, bestalde, oposizioko kideek, eta, ezezko botoa eman zuten alderdi jeltzaleko kideek. Honela adierazi zuen Josu Ezkurdiak, Eskoriatzako EAJko bozeramaileak: "Gure proposamena egin genuen Ogasun Batzordean; batetik, kiroldegiko tasak mantentzeko, eta ez igotzeko; ezetz esan ziguten. Zabor tasena, berriz, Eskoriatza ordaintzen ari da tokatzen ari zaiona baino % 22 gehiago gure estimazioaren arabera. Mankomunitatean, elkartasunagatik kostu guztiak banatu egiten dira; gai hau aztertzea eskatzen dugu. Datuak ez ditu garbi ematen Mankomunitateak, eta eskoriatzarren izenean, datu zehatzak eskatzea nahiko genuke. Horregatik ezezko botoa emango dugu".
Horri erantzunez honakoa azaldu zuen alkateak: "Oposiziokoen kalkuluen arabera, Eskoriatzak ordaintzen duenarena baino %22 gutxiago ordaindu beharko lukeela diote, baina, ez dakit nondik atera dituzten datu horiek. Hurrengo lizitaziora begira daudela uste dugu, baina, zenbaki horiek ez daude zehaztuta. Printzipioz, guk Mankomunitateak esaten diguna aplikatzen dugu; Mankomunitatea elkartasun modu bat da zabor-bilketa egiteko".