Aste Berdea hasteko, energia-eraginkortasun handiagoa, komunitatearen parte-hartzea eta jasangarritasuna uztartzen dituen birgaitze-eredu bat aurkeztuko dute urriaren 8an Ibarraundi museoan, 18:30ean. RenPower-BiBizi proiektuaren bidez, etxebizitza-eraikinak nola birgaitu daitezkeen modu integral eta komunitarioan azalduko dute Eider Iribar Solabarrietak eta Ander Ayala Larrañagak (Goiener) eta Nestor Arana Arexolaleibak (Esnargi).
Energia kontsumo arduratsua
"Ibarraundin egingo da bizilagun komunitate batean energia erabileraren ikerketa eta aurrerantzean jarraitu daitekeen bideorriaren aurkezpena. Ekitaldia RenPower proiektu europarraren baitan eta Esnargi eta Goiener erakundeen arteko elkarlanaren emaitza da. Ikerketa lanak ikuspegi teknikoa eta soziala uztartzen ditu, eta Irlandako EcoVision eta Goienerreko adituek garatu dute. Proiektuak energia kontsumo arduratsua eta komunitatearen inplikazioa sustatzea du helburu", adierazi du Nestor Aranak.
