Irailean, eskola komunitateko ikasleek, irakasleek eta familiek elkarlanean kartelak egingo dituzte, eta mural bat margotu. Urriaren 18an, eskolako ikasle ohien kintada bazkaria egingo da –Kintadako ordezkari bat aukeratu eta bidali bere izen-abizenak, telefono zenbakia eta kintadaren urtea 608 621 008 zenbakira–; ikus-entzunezkoa egiten ari dira; abenduan erakusketa irekiko dute… Gainera, Goieskola elkarteak ere urteak betetzen ditu: 25 urte, hain zuzen. Bi ospakizun horiek elkarrekin ospatuko dituzte, festa handi batekin, eta informazioa aurrerago zehaztuko dutela adierazi dute eskolako arduradunek.
Udako erronka, gaindituta
Urteurrena aurten ospatuko den arren, antolaketa lanak iaz hasi zituzten. "Lantaldeak antolatu genituen, ekintzak lotzeko; horien artean, 55. urteurreneko logo lehiaketa izan zen. Parte-hartzaile asko animatu ziren eta aukeratutako logoa eskolako festan aurkeztu genuen. Logoa daramaten pegatinak egin genituen eta udan zehar egiteko erronka bat martxan jarri zen: Noraino iristen da eskolako pegatina? Jendeak eskolako pegatina munduko hainbat lekutan itsatsi eta argazkia bidali du. Itzela izan da parte-hartzea", diote Luis Ezeizako zuzendaritzako kideek.
