Ezker Anitza-IUko Antolakuntza eta Finantza arduraduna izango da Juan Luis Merino eskoriatzarra aurrerantzean, domekan, uztailaren 13an, hala erabaki ondoren. Azaldu dutenez, Arantza Gonzalezekin, koordinatzaile nagusiarekin, partekatuko du ardura hori, eta "indar gehiago" izango du zuzendaritza berrian. Horrez gain, taldera batu zaizkie: Ester Palacio, Komunikazio arduraduna; Ana Isabel Saiz, Feminismokoa; Alba Gutierrez, Harreman Politikoetakoa eta Nazioartekoa; Jon Hernandez, PCE-EPK-ko legebiltzarkidea eta idazkari nagusia, eta Ekintza Politiko eta Programako burua; Xabier Pombo, Instituzionalekoa; eta Hugo Martin-Santos, Bataila Kulturalekoa.
Zuzendaritza berriak "euskal ezker alternatiboaren espazioan indar erabakigarria" izatea du helburu nagusitzat, Gonzalezen hitzetan: "Esperientzia eta kide berriak uztartzen dituen talde bat bildu dugu, eskubideetan eta justizia sozialean irabazteko politikak artikulatzeko eta euskal ezker alternatibo eta aurrerakoiaren espazioa indartzeko aliantzak bultzatzeko, ultraeskuina eta eskuina aske dauden une honetan". Horretarako, "elkarrekin" lan egingo dutela nabarmendu dute, "guztion onerako eta euskal herritarren benetako kezka eta beharretarako".