Eskoriatzako San Pedro elizako organoaren ondoko beiratea konpondu du Nahia Pascual (2001, Eskoriatza) artistak. Gasteizko Vitrales Mikel Delika enpresan artelanak zaharberritzeko zerbitzua ematen duen tailerrean egiten du lan, eta, beiratea konpontzeko deitu zietenean, hark gura izan zuen lana hartu. Izan ere, haren bizitokirako enkargua izanda, ilusioz hartu du erronka, eta mimoz aritu da zaharberritze lanean. Lanaren prozesuak bi aste inguru iraun duela adierazi du eskoriatzarrak.
Originala mantendu
"Beirateak kristala eta berun-profila du. Beirate zati batzuk apurtuta zeuden, berun-profila ere janda, eta nahiko egoera txarrean. Beraz, beiratea tailerrera eramatean lurrera ez erortzeko, zintekin jarri genuen, lehenbizi. Kristaletik apurtutako zatiak kendu egin behar dira, neurriak hartu eta berriak egiten hasi eta ordezkatu. Lehenengo, beiratearen erdigunea konpondu nuen, eta gero, alboetakoak. Izkinak izan dira prozesuko zailena, eta, bost edo sei pieza berrerabili arren, gainontzekoa berria egin behar izan dut; betiere, neurriak errespetatuta. Dena muntatzerakoan, zementatu, garbitu eta sikatutakoan, bukatuta geratu da lana. Beti saiatzen naiz, material originaletik ahalik eta gehien mantentzen. Zerbait berria jartzen badut, originala oso gaizki dagoelako da", adierazi du Pascualek. Lana entregatuta, beste enpresa bat arduratuko da beiratea instalatzeaz.