Programazio betea prestatu dute, beste urte batez, Eskoriatzako Txosna Batzordeko kideek. Aurten, gainera, egun bat lehenago hasiko dituzte jaiak, Gatza eta berakatza, –Aupa Eskoitza!– lelopean, eta, beraz, bost eguneko festak izango dituzte aurretik eskoriatzarrek. "Autogestioan oinarritutako batzordea izanda eta gurea herri txikia izanda, aurrekontu txikiarekin, musika talde handiak ekartzea zaila zaigunez, nahiko egitarau xumea egitera mugatu gara. Hala ere, pozik gaude antolatutakoarekin eta ondo pasatuko dugula ez dugu zalantzarik", adierazi dute Eskoriatzako Txosna Batzordeko kideek.
Azken orduko aldaketa
Musika taldeen kontzertuei dagokienez, aukera ugari izango dira egunero. "Nick Linbött, Aiama, Chuleria Joder! eta Txit Karramarro taldeak izango dira, eta Eskoriatzako DJ Moto eta 3 Kuervos, esaterako. Talde horri dagokionez, duela bi urte eman behar zuten kontzertua, baina, ezin izan zutenez, berriz eman diegu aukera jaietan kontzertua eman dezaten. Bestetik, Orekakero taldeak ez du kontzerturik emango, taldekide bati ebakuntza egin diotelako. Euren ordez, Blueskon taldea arituko da, musika eskolako konboa", adierazi dute antolatzaileek.
Jokoak, isilpean prestatuta
Kuadrillen Arteko XII. Bandera altxatzeko jolasei dagokienez, lagun talde txiki bat aritu da horiek prestatzen. "Partaideek jolasak nola diren jakin gabe, sorpresekin eta berrikuntzekin datoz. Jendea motibatuta etor dadila, eta gogoz; ondo pasatuko dugu".