Mondragon Unibertsitateko Humanitate eta Hezkuntza Zientzien Fakultateko Eskoriatzako campuseko eraikin historikoa inauguratu dute, hainbat birmoldaketa egin ondoren. Instalazioak "modernizatzea" izan dute lanek helburu, eta, era berean, ondare historikotzat katalogatutako eraikinaren kontserbazioa bermatzea. Horretarako, lehendabizi, gune administratiboak berrantolatzeko lanak egin zituzten, hala nola harrera, idazkaritza akademikoa, dekanotza eta komunak, eta eraikinaren larrialdi-ebakuazioa, irisgarritasuna eta segurtasuna hobetzen aritu dira azkeneko fasean.
Joan den egubakoitzean, hilaren 13an, inauguratu zuten XVII. mendean eraiki zuten eta historian zehar hainbat erabilera izan dituen eraikina, ospitalea, komentua eta biatoristen ikastetxea izan baita, besteak beste. Herritarrei irekitako ekitaldi bat izan zen, Manttalingo Alaba ikuskizunarekin.