Atzegi elkarteak aniztasun intelektuala duten pertsonen eskubideak defendatzen dituen elkartea da. Debagoieneko kideek urtero egiten dute bailara mailako jaia eta aurtengoa zapatuan, hilak 21, egingo dute Eskoriatzan.
Festa ibiltaria da –iaz Bergaran egin zuten– eta balio izaten du kideak elkartu eta festa giroko ospakizuna egiteko. Horrekin batera, elkartearen balioak zabaltzeko eta kolektiboari ikusgarritasuna emateko ekitaldia ere bada.
Ekitaldia, bazkaria eta dantzaldia
Zapatuan, 12:30ean ekingo diote egitarauari. Zaldibar aretoan elkartuko dira eta bertan elkarteko erabiltzaileak izango dira protagonista. Ekitaldi "xumea" iragarri du Debagoieneko koordinatzaile Agurne Barrutiak, baina "garrantzi handikoa" Atzegi elkarteko kide guztiendako.
Amaitutakoan, kalejiran egingo dute Fernando Eskoriatza plazarainoko bidea txistulariek lagunduta. Bazkaria, berriz, 14:00etan izango da Eskoriatzako frontoian. Antolatzaileek aurreikusten dute 100 bat lagun elkartuko direla. Osteko dantzaldiarekin gozatuko dute guztiek.