Eguraldi txarraren mehatxuak, ohi baino jende gutxiago erakarri badu ere, eguraldiak ateri eutsi du eta jai giroa ez da falta izan Atxorrotxen magalean.
Gurutze Santuaren ermitan meza ospatu ostean, apaizak bailara bedeinkatu du, bertaratutako hainbat lagunekin batera. Atxorrotx azpiko zelaira igo diren herritarrek mokadutxo bat hartzeko eta zerbait edateko aukera izan dute, Itzartu Gazte Asanblada eta Gorosarri Dantza Taldeko kideek elkarlanean jarritako tabernan.
Atxorrotxeko Eguna behar bezala amaitzeko, erromeria izango da Fernando Eskoriatza plazan, 18:00etan hasita, Imanol Intxausti eta Iñaki Larrañaga bikotearekin.
