Gainera, Axtroki Merkatari Elkarteko establezimenduetan zapatua aurretik erosketaren bat egiten dutenek txartel bat eskuratuko dute eta zapatuan lore batenkin aldatzeko aukera izango dute.
2.500 txartel banatuko dituzte
Loratu azokan askotariko lore eta landareak izango dituzte salgai Usurbilgo Urtinea lorategikoek, baina horietako asko doan jaso ahal izango dituzte herritarrek. "Axtroki Merkatari Elkarteko denda eta tabernetan egindako erosketen truke bonuak edo txartelak emango dizkiegu herritarrei; txartel batekin lore bat lortuko da, eta, guztira, Axtroki Merkatari Elkartea osatzen dugun 23 establezimenduen artean 2.500 txartel banatuko ditugu; hau da, 2.500 lore", adierazi du Jabi Altunak, Axtroki Merkatari Elkarteko kideak.
Herria biziberritzeko
Herritarrek herrian erosteagatik opari bat jasoko dute, eta, oparia sinbolikoa bada ere, Loratu egitasmoak helburu zehatza duela azpimarratu du Altunak: "Herrian erostea da ekimenaren asmo nagusia. Hori horrela, bertan erosten dutenekin detaile bat izan nahi dugu. Merkatari txikiei bultzada emateko urteroko hitzordua da, eta arrakastatsua izango dela aurreikusten dugu".
