Eskoriatzako udaleku irekiak uztailean zehar haurrei aisialdiaz gozatzeko antolatzen den eskaintza da. Lagun berriak egin eta goiza jolasean ibiltzeko aukera paregabea da, eta urtero moduan Eskoriatzako txokoak ezagutzeko, ur jolasekin freskatzeko, irteerekin gozatzeko proposamenak egiten dituzte Txirikila Aisialdi Elkarteko kideek. Hori horrela, apirilaren 1etik eman dezakete izena interesdunek.
Uztailaren 3tik 22era bitartean izango dira udaleku irekiak, eta 2013 eta 2022, biak barne, urte artean jaiotako haurrei zuzenduta dago. Ordutegia 09:00etatik 13:00etara izango da egunero, eta, eguenetan, berriz, egun pasak egingo dituztenez 09:00etatik 17:00etara arteko ordutegia izango dute. Prezioa: 75 euro da haur bakoitzeko, bi haur eramateagatik 145 euro ordaindu beharko da, eta, hiru haurrengatik ordaindu beharreko prezioa 219 euro da.
Kontuan hartzekoa
Izena emateko epea apirilaren 1etik 11a artekoa da, eta izen-ematea online egingo da udal webgunean dagoen loturako formularioa beteta eta ordainagiria txirikila@gmail.com era bidaliz. Antolatzaileek jakinarazi dutenez garrantzitsua izango da ordainagirian haurraren izena eta abizenak eta jaiotze urtea jartzea; eta, haur bat baino gehiago apuntatuz gero, haur bakoitzeko izen-emate formulario bat eta ordainketa ordainagiri bat bidali beharko da.
Online izena emateko unean arazoren bat duenak, Tortolis ludotekara joan beharko du, eta, bertan informazioa eska dezake edo zalantzak argitu, astelehenetik egubakoitzera 16:45tik 19:30ak arteko ordutegian.
Begirale bila
Udaleku Irekiak programarako ezinbestekoak dira begiraleak eta Txirikila Aisialdi Elkarteak abian jarri du hautaketa prozesua. Apirilaren 11ra arte hautagaitza aurkezteko aukera egongo da, eta interesdunek, ezinbestekoa izango dute formularioa ongi betetzea eta eskatutako dokumentazioa tortolisludotekaeskoriatza@gmail.com helbidera bidaltzea. Formularioa, puntuazio sistemaren gaineko informazioa eta baldintzak udal webgunean daude eskuragai.
