Eguna Eskoriatzan, eta urte berean jaiotako eskoriatzarrek elkartzeko aitzakia izango dute, beste urte batez. 18 urte beteta edo betetzear zeuden herritarrei, hau da, Santa Ageda neska-mutilei, parranda egun batean bidelagun izateko eta herriko giroa indartzeko asmoz sortua, mantendu egin da festa eguna denboraren poderioz, eta Kinttaden Eguna ondo errotuta dago herrian gaur egun. Hamalaugarren edizioa izango da aurtengoa, eta herritarren festa gustukoenetako bat da, duda barik; herritik sortuta, herriarentzat egindakoa.
Bazkaria, kalejira eta DJak
Zapatu eguerdian poteoa egin, eta kintada bakoitza bere adinekoekin bazkaltzera joango da. Horietako asko, azken hiru urteetan moduan, Itzartu Gazte Asanbladak Manuel Muñoz kiroldegian antolatutako herri bazkarira joango dira, 15:00etan. Adin askotariko 400 lagun inguru batuko dira bertan bazkaltzeko, eta, bapo jan ostean, 17:30ean, Elgoibarko Patxangoi elektrotxarangak lagunduta, kalejiran Fernando Eskoriatza plaza aldera joango dira herritarrak, kiroldegitik hasita; 22:00etan, berriz, DJ Txola Ta Potxola arituko dira Fernando Eskoriatza plaza musikaz girotzen.
Prestaketa, auzolanean
Otsailaren 8an Manuel Muñozen egingo den herri bazkariko prestaketa eta jasotzea auzolanean egingo dute. Hala, 11:00etarako, kintada bakoitzeko arduradun batzuek mahaiak eta aulkiak jartzera joan beharko dute kiroldegira, azken hiru edizioetan egin moduan.
Itzartu Gazte Asanbladako antolatzaileen arabera, kintadako hamar pertsonatik bakarra badoa nahikoa izango da: "Hogei lagun baldin bazarete kintadetan, bi lagunek joan beharko dute; 26 pertsona izanda, berriz, hiru pertsona bezala kontatuko da… Kintada bakoitzak adostu ditzala arduradunak".
