Erritu zaharrak berpiztu baino gehiago, berriak sortzen ari dira Eskoriatzan, bizipenak asko aldatu direla argudiatuta. Hala, iaz bezala, Eskoriatzako beldur-harrapakariak haurren eta helduen beldurrak batzen izango direla adierazi dute antolatzaileek.
Egitarau betea
Goizean zehar herriko ikastetxeek Fernando Eskoriatza plaza apainduko dute azken asteetan egin dituzten apaingarriekin. Eta arratsalde osoan gaztaina-erreak egongo dira plazan. 17:30ean hasiko da ginkana, makillaje-txokoa jarriko dute, baita eskea ere. 19:00etan hasiko da ekitaldi nagusia, eta, amaitzeko, zezensuzkoa egongo da.
Beldurrak sutara
"Iaz sortu genuen beldur-harrapakarien figura, eta aurten gorpuztu eta sendotu egin nahi dugu. Hala, umeentzako ginkana-jokoa eta eskea mantentzen bada ere, 19:00etan Fernando Eskoriatza plazan egingo den ekitaldia berezia izango dela uste dugu", adierazi dute Eskoriatzako Udaleko ordezkariek.
Guztira lau beldur-harrapakari egongo direla jakinarazi dute, eta haurrek nahiz helduek paperean idatzi edo margotuko dituzten beldurrak batu eta sutan erretzeko ardura izango dute, Beldurrak erre, iluntasuna bizi lelopean.