Mondragon Unibertsitateko Humanitate eta Hezkuntza Zientzien Fakultateak haur eta gazteentzako 231 liburu aztertu ditu, iaz argitaratutakoak eta euskarazkoak, eta 2023ko Haur eta gazte literatura irakur gida osatu du, hiru kategoriatan banatuta: liburu gomendagarriak, oso gomendagarriak eta zerrenda berezia. Horretarako, hizkuntzaren erabilera, literatura-kalitatea eta gaien tratamendua aztertu dituzte, besteak beste.
Zortzi erakundeetako hamalau profesional –liburuzainak eta irakasle adituak– aritu dira gida ontzen, liburuak irakurrita eta aztertuta: Aramaioko Udal Liburutegia, Bergarako Udal Liburutegia, Eskoriatzako Udal Liburutegia, Legazpiko Udal Liburutegia, Oñatiko Udal Liburutegia, Aretxabaletako Kurtzebarri Eskola, Eskoriatzako Luis Ezeiza Herri Eskola eta Mondragon Unibertsitatea. Koordinazioari dagokionez, MUko Mari Karmen Apraizen ardura izan da, eta gidaren azala Maddi Martinek egin du, Ikus-Entzunezko Komunikazioko ikasleak.
Adinaren banaketa
Liburuak irakurri eta aztertu ondoren, gutxi gorabeherako adina ezarri diete, egileek ohartarazi duten arren "orientagarria" dela: "Erritmoak, haurren zaletasunak eta abar sailkaezinak dira. Gure ustez, haurrek liburuak askatasunez aukeratzea oinarrizkoa da, eta irakurzaletasuna sortzeko, berriz, funtsezkoa".
Mondragon Unibertsitatea 1990ean hasi zen haur eta gazteentzako liburuen gidak kaleratzen, udal-liburuetako liburuzainen eta zenbait ikastetxeetako irakasleen laguntzarekin, eta sarean daude 2001etik aurrerako zenbakiak.
