Zazpi elizateen oinezko martxa Txikirri-txikirri mendi martxarekin txandakatzen dute, eta aurten, Bolibar aldean egingo dute zirkularra.
Parte hartzeko ez da dirurik eskatzen, eta antolatzaileek esan dute jendea pozik geratzen bada nahikoa dutela. "Martxa honen jatorrizko espiritua domeka goiza pasatzea izan zen, Eskoriatza ezagutzeko, parte-hartzaileen arteko lehia barik, nor bere erritmora. Hala, Jose Manuel Crespo Santanderino, Pako Izaguirre… eta haien lagunartea hasi ziren antolatzen oinezko martxa hori. Hala ere, zerbait informala izan arren, anbulantzia jarri behar zen, administrazioarekin gestioak egin, ibilbidearen markaketa… Atxorrotx Kultura Elkartekoak sartu ginen antolakuntza horretan; betiere, Eskoriatzako Udalaren babesarekin eta herriko zenbait enpresaren laguntzarekin. Hala, egunean hamabi lagun inguru arituko gara antolakuntzan; batzuk elkartekoak eta beste batzuk ez. Kontua ondo pasatzea izango da; martxa sortu zeneko ideiari jarraituz", adierazi du Edorta Barandiaranek, antolakuntza taldeko kideak.
