Kultur etxean eta Manuel Muñoz kiroldegian aspaldidanik daude desfibriladoreak, baina, orain arte, eraikinak itxita egoten zirenean ezin izaten ziren erabili, eraikinen barrualdean geratzen zirelako. Joan den astetik aurrera, eraikinen kanpoaldera atera eta, beraz, orain, 24 orduz daude eskuragarri.
Desfibriladorea deskarga elektrikoak ematen dituen tresna da, bihotz-arazoren bat gertatutakoan taupaden erritmo normala berrezartzeko ezinbesteko tresna. Udal eraikinetan dauden bi desfibriladoreak geolokalizatuta daude; hau da, aparatua bere tokitik ateratzen den momentuan, larrialdi zerbitzuei abisua bidaltzen die eta emergentzia-plana aktibatzen du. Horrez gainera, aparatuak ahots bidez adierazten dio erabiltzaileari zeintzuk diren emergentzia zerbitzuak iritsi bitartean jarraitu behar dituen urratsak. Desfibriladore horiek erabilera errazekoak diren arren, formakuntza-saioak antolatzeko asmoa du Eskoriatzako Udalak.
