Eskoriatza euskal kultur ekimenen erdigunean jarri zuen joan den astean, hamabostgarren aldiz, Errekan Gora jaialdiak. "Zuzeneko zazpi emanaldiek adin guztietako publikoaren arreta erakarri zuten, eta hori gura genuen", adierazi du Iñaki Kortazar antolatzaileak, eta gaineratu "herritar asko" hurbildu zaizkiela zorionak ematera, "pozik" geratu zirenaren seinale.
Izan ere, "jende asko" egon zen Kokeinen ostiraleko irekiera kontzertuan, zapatu eguerdian Irati Etxebarrietaren kontzertua "sorpresa polita" izan zen, Pasadenan ere "giro ederrak" jarraitu zuen, eta "zeresanik ez" arratsaldean Broken Brothers Brass Band taldeak egindako kalejiran eta Xiberoots-en gaueko emanaldian. Domekan, bai Arrasate Musikalen Big Band-ek eta bai Nevadah-k "askotariko musikazaleen interesa" piztu zuten, gainera.
Era berean, antolatzaileak esker oneko agertu dira soinu teknikariekin, asteburuan lanean ibili ziren Atxorrotxeko bazkideekin, Udalarekin eta udal brigadako kideekin.
