Gaztelekuko arduradunek adierazi moduan, ostiral –17:00tik -20:30era–, larunbat eta igandetan –16:30-20:30etara– egoten da zabalik gunea, irailetik ekainera bitartean. Horrez gain, Gabonetan, Aste Santuko oporretan eta udan eskaintza bereziak antolatzen dituzte, bertako erabiltzaileekin hala erabakita.
Gaztelekuko zerbitzuaren bitartez, nerabeek, ondo pasatzeaz gain, beste hainbat esperientzia ere ikasten dituzte: "Zerbitzuaren helburuen artean, parte-hartzea, euskararen erabilera, neska eta mutilen arteko berdintasuna eta prebentzioaren sustapena daude. Nerabeei erabat irekia da, edozeinek har dezake parte, bertaratu eta izena ematea besterik ez da egin behar zerbitzuaz gozatzeko, eta doakoa da", azaldu dute arduradunek.
Irailean zehar erabiltzaile berriei begira jarriko dira bertako hezitzaileak, zerbitzuaren funtzionamenduaren berri eman, zerbitzuak dituen baliabideak erakutsi eta hainbat ekintza antolatuz. Esaterako, datorren astean 3X3 txapelketa egingo dute, eta, hurrengoan, talo tailerra.