Irailaren 14an, 21ean eta 28an garatuko dituzte aurtengo Ostegun Ibiltariak, 19:00etan, Zaldibar antzokian, eskoriatzarrek egindako bidaien berri emateko helburuarekin; egingarriak diren bidaiak, gertukoek egindakoak eta gertutik azaldutakoak.
Lehenengo saioko gonbidatua Maialen Salido izango da eta Txekiar Errepublikan bizitako abenturak partekatuko ditu. Haren esanetan, "herrialde hori aipatzean gehienoi Praga datorkigu gogora, baina herrialdeak beste aukera ugari ere eskaintzen ditu: postal moduko herritxoak, gaztelu ikusgarriak, garagardorik goxoenak edota Narnia filmeko basoa bezalako ipuinetako paisaiak". Eta mendia nahi izanez gero, aldamenean topatuko ditu bidaiariak: "Horretarako autoa hartu eta ondoan dagoen Eslovakiara jo genuen, Tatra mendikatera. Alpeen itxurako mendiak dira eta Poloniarekiko muga naturala osatzen dute".
Hurrengoak, bizikletan egiteko modukoak
Datorren astean, ostera, Balkanetako herrialdeak izango ditu hizpide Beñat Errastik. Bost lagunekin ibili zen Dubrovniken hasi eta bukatutako ibilbidea pedalkadaz pedalkada egiten. Tartean, Kroazia, Bosnia-Herzegovina, Montenegro, Kosovo eta Albania bisitatu zituzten, bide nagusiak alde batera utzi eta errepide galduetatik barrena Balkanetako bihotzean murgilduta.
Azken gonbidatuak, Roman Ezeizak, bizikleta izan zuen bidelagun baita ere, baina kasu honetan etxetik bertatik hasi zuen bidaia, Eskoriatzako Txalaparta jatetxetik. Sei egunetan Euskal Herriko txoko ugaritan egon zen, haren adiskide Manu Lagarekin batera.
