Botoen %100a zenbatuta, Eskoriatzako boto-emaileek 1.241 boto eman dizkiote udal hauteskundeetan EH Bilduri (%59,9), 626 EAJri (%30,2), 88 Elkarrekin Eskoriatzari (%4,2) eta 84 (%4,1) PSEri. Hala, lau zinegotzi izatetik zazpi izatera pasako da EH Bildu, eta seitik laura EAJ. Udal gobernua bere kabuz osatu ahal izango du EH Bilduk.
Hona hemen EH Bilduren zazpi zinegotziak: Edorta Zubizarreta Alegria (alkatea), Alaitz Orueta Arrese, Edorta Barandiaran Garcia, Xabier Uriarte Iñurrategi, Irati Iglesias Pozo, Mikel Luengo Gabarain, eta Dorleta Sologaistoa Aguiriano.
Hona hemen EAJren lau zinegotziak: Jose Ramon Zubizarreta Alegria, Maite Uribe Beristain, Antonio Regaño Sajeras eta Maria Purificacion Regidor Varela.
Batzar Nagusiak vs Udal hauteskundeak
Bi hauteskundetarako botoa eman dute eskoriatzarrek gaurkoan, eta ondorengo taulan bien arteko konparaketa jasotzen da. Batzar Nagusietarako boto-emaileen ia erdiak (%49,80) bozkatu du EH Bilduren alde, %35,81ek EAJren alde, %4,75ek Elkarrekin-en alde eta %6,7k PSEren alde. Hau da, EH Bilduren nagusitasuna apalagoa izan da Batzar Nagusietan udal hauteskundeetan baino; era berean, EAJk babes handiagoa lortu du eskoriatzarren artean Gipuzkoako Batzar Nagusietan udal hauteskundeetan baino.