Eguna iristeko denbora dezente geratzen den arren, Eskomotor taldeko kideek maiatzaren 20rako prestatu duten egitarauaren berri eman dute sare sozialen bitartez. "Jai hori antolatzearen asmoa da dirua lortzea Eskoriatzan rallysprinta antolatzeko. Ea egin dezakegun… Horrekin batera, motorzaleak batzea, zaletasuna sustatzea eta, motorra aitzakia, egun ederra pasatzea", adierazi du Eskomotor taldeko Gorka Idigorasek.
Eguna hasteko, 09:00etan, eskupilota txapelketa jokatuko da Joseba Iñurrategi frontoian. "Oraingoz, zortzi bikotek eman dute izena, eta 16 bikoteko muga ezarri dugu. Partiduak hamabi tantora izango dira, eta bost eta erdiaren barruan jokatuko dira". 10:00etan, berriz, 4x4 trialeko autoak, auto klasikoak, lasterketa autoak eta motorrak ikusteko aukera izango da, zenbait gunetan jarriko duten erakusketarekin.
Ibilgailu klasikoak erakusgai
10:00etatik aurrera, Gorosarri plazan, 4x4 trialeko autoak izango dira, Santa Marina plazan auto klasikoak, baita motorrak ere, eta Fernando Eskoriatza plaza parean lasterketako autoak izango dira ikusgai. 13:00etan, trikipoteoa egingo dute, eta 15:00etan, berriz, herri-bazkaria izango da frontoian. Txartelak 25 eurotan jarriko dituzte salgai apirilaren 17ko astean, Aldatz eta Inkernu tabernetan, eta horiek erosteko azken eguna maiatzaren 15a izango da. Menua, berriz, Euskal Parrillaren eskutik, honako hau izango da: entsalada mistoa, txerri-saiheskiak eta baserriko oilaskoak parrillan, eta Ezeizako pasteltxoak. Edaria, kafea eta ogia barne, sagardo-kupela ere jarriko dute.
Kontzertuak, 21:00etan, plazan
Bazkalostean, 17:30ean, eskupilotako finala jokatuko da, eta, ondoren Oier Mendizabal Mutrikuko DJak girotuko du musikarekin. Horren ostean, 21:00etan, punk-rock estiloa uztartzen duten taldeen musika kontzertuak izango dira Fernando Eskoriatza plazan. Oihu!, Youth United, Erne eta Txakurrak taldeak izango dira oholtza gainean. Emanaldiak amaitzen direnean, Mendizabalek musika dantzagarria jarriko du, egunari amaiera emateko.
