"Zebrabideen egoera eta bere ingurua nahiko kaxkarra da. Horregatik, iaz, berrizteko lanak adjudikatu egin ziren eta orain obrak burutzen ari dira. Zebrabideez gain, ondoko espaloiak ere egokituko dira, irisgarritasuna bermatzeko. Zuloak estali, porlan berria bota eta kutxatilak… egokitu", adierazi du Josu Ezkurdiak, Eskoriatzako Hirigintza eta Mugikortasun batzordeburuak.
2022 azaroko hirigintza batzordean bi aurrekontu aurkeztu ziren. Tekniko aldetik biak antzekoak (Asfaltos Urretxu eta Asfaltos Orsa). Batek, 39.775 euroko aurrekontua aurkeztu zuen eta besteak 35.263 eurokoa. Bigarrena aukeratu zuen Eskoriatzako Udalak.
Oinezkoentzako espazioak bermatu
Horretaz aparte, Aranburuzabala kaleko hainbat tokian hesiak jarriko dituzte eta gaur egun dauden pibote txikiak kendu egingo dira. Horrela, alde batetik, kaleko itxura hobetu nahi dute, eta, bestetik, oinekoentzako pasoa bermatu eta segurtasun gehiago eman nahi zaie. Hesiak aldika jarriko dira, etxeko atarien parean, eta ez kale osoan.
