Asteon, ezohiko osoko bilkura egin dute udalbatzako kideek gai bakarra tratatzeko. Hain zuzen ere, Haur Eskola –0-3 urte, Haur Hezkuntzarako lehenengo zikloa– udal zerbitzuaren jarduera amaitzea izan zen hartu beharreko erabakia. Aho batez onartu zuten.
"2000. urtean Eskoriatzako Udalak 0-3 urte bitarteko haurren udal zerbitzua eskaintzeko aukera ezarri zuen eta zerbitzu horretara beti aurkeztu da Arizmendi eta eurek kudeatu dute gaur arte. Orain, 2023-2024ko ikasturtera begira adierazi digute udal zerbitzu moduan kudeatzen ez duela jarraituko", adierazi zuen Joserra Zubizarretak, Eskoriatzako alkateak.
Zubizarretak hauxe gaineratu zuen: "0-3 udal zerbitzurik ez da egongo, Partzuergoak eskainitako zerbitzu publikoa dugulako herrian. Hala ere, Arizmendik bere proiektu propioa garatu dezake; kontua da ez dutela Eskoriatzako Udalaren zerbitzua gisa kudeatuko; euren kabuz garatutakoa eskainiko dute".
