Estreinakoz herri bazkaria izan da Manuel Muñoz kiroldegian, Itzartu Gazte Taldeak eta Eingeinke egitasmoak antolatuta. Bederatzi kintada izan ziren bertan bazkaltzen –280 lagun–; tartean, aurtengo Santa Ageda neska-mutilak. Jana aparta izan zen, txotx egiteko aukera eta bapo bazkaldu ostean musika eta dantza. Hala ere, bertan batu ziren kintadez gain, bazkaltzen ematen duten herriko taberna guztietan izan ziren kintaden bazkariak; Gure Ametsa jatetxera eta Maulandara herrigunetik irtenda joan ziren hainbat lagun, baita Aretxabaletako jatetxeren batera ere, kasuren batean. Gauzak horrela, ondo errotuta dagoen jaiegun horretarako Eskoriatzan bazkaltzeko leku gutxi daudela argi geratu da, baina herriko gazteek egoerari buelta ematen asmatu dute, eta mugarri bat sortu.
Dantzak domeka honetan
Amaitu da Kinttaden Eguna, baina Santa Ageda neska-mutilek azken hitzordua izango dute domeka honetan, 19:00etan, Fernando Eskoriatza plazan. Izan ere, dantzak egingo dituzte.