Gaur zortzi egin zuten Kinttaden Eguneko herri bazkarian parte hartuko duten kintada guztietako ordezkariek batzarra, kultura etxean. Catering bat kontratatu dute jatekoa prestatzeko eta zerbitzatzeko; udal brigadakoak ere izango dira laguntzen, baina Eingeinke ekimenekoek eta Itzartu Gazte Asanbladako kideek azpimarratu dute auzolana ezinbestekoa izango dela eta jarrera egokia mantentzea funtsezkoa izango dela.
Muntatu eta jaso, auzolanean
"Bederatzi kintada izango gara Manuel Muñoz kiroldegiko bazkarian eta 11:00etarako kintada bakoitzeko bi ordezkari bertan izateko eskaera egin dugu. Horrela, zenbait lagunen artean kantxako lurra estaltzeko eta, bide batez, mahaiak eta aulkiak jartzen laguntzeko. Horrekin batera, jarraitu beharreko arauak gogoraraziko ditugu. Bazkalostean, mahaiak eta aulkiak jasotzen lagundu beharko dugu, eta, 19:00etarako jasota izan beharko ditugunez, kintada bakoitzak erabaki dezala nola egin: lagun gutxi batzuek dena jasotzea edo kintada guztiaren artean egitea. Hala ere, kintada bakoitzak bere mahaiaz arduratu beharko du", adierazi dute Eingeinke ekimenekoek eta Itzartu Gazte Asanbladako ordezkariek.
Errespetatu beharreko arauak ere kontuan izateko eskatu dute antolatzaileek: kiroldegi barruan ez erretzeko, janariarekin ez jolasteko, suziriak ez sartzeko eraikinera –Santa Ageda neska-mutilei zuzendutako mezua–… Laburbilduz, gizalegez eta errespetuz jokatzeko.
Musika bozgorailuetatik
Zapatuko menua honako hau izango da: entsalada mistoa, baserriko oilaskoa eta txerri-saiheskia parrillan, Ezeizako pasteltxoak, ogia, kafea eta edariak. Horrekin batera, aukera beganoa eta gluten gabekoa ere izango da. Prezioa 23 euro da eta prezio horren barruan sartu dute garbiketa-enpresa baten kontratazioa. Musika jarriko dute bozgorailuetatik eta jarriko duten kantu sortaren aukeraketa irekita utziko dute, batzen diren guztien gustuko kantuak entzun daitezen.
