Astelehena ezkero, Garaguneko kideek egindako artelanen erakusketa dago ikusgai Ibarraundi museoan. Guztira, 55 artelan batzen ditu erakusketak, eta tartean dira Bittor Arrieta Leibar eskoriatzarraren lanak. Artelan horiek hainbat teknika eta material erabiliz egindakoak dira, eta herri batzuetan egon dira ikusgai. Ibarraundin egon diren tartean, ikastetxeetako taldeentzako bisita gidatuak antolatu dituzte eta zuzenean ezagutu ahal izan dituzte zein izan den emaitzetara heltzeko prozesua, artista bakoitzaren estiloa eta abar. Bihar izango da erakusketa ikusteko azken eguna.
Bertakoari balioa ematea
Horrekin batera, Garagunekoen erakusketaz batera, zero kilometroko artisau azoka izango da Ibarraundi museoan. Aurten, bigarren urtez egingo da, eta herriko artisauek produktu bereziak eta eskuz egindakoak jarriko dituzte salgai eta erakusgai. "Zortzi postu izango dira Ibarraundi museoan izango den zero kilometroko azokan. Iaz egin genuen lehenengo aldiz, eta, arrakasta izan zuenez, egitasmoa berriro antolatzea erabaki dugu. Ea zer-nolako harrera izaten duen", adierazi du Arantxa Unzuetak, Eskoriatzako Udaleko Kultura teknikariak.
Iazko artisau berak Ana Jara, Lourdes Martinez, Oscar Garcia, Jose Angel Petralanda, Patricia Ruiz, Maitane Axpe, Kaosa taldeko Kristina, Jasone eta Ana eta Buztinate buztingintza eta zeramika taldeko kideen izenean Alvaro Garcia izango dira museora produktuak eramango dituzten artisauak. Besteak beste, honako produktu hauek izango dira bertan: zurezko erlojuak, bastoiak, poltsak eta koleteroak, larruzko gauzak, xaboiak, xanpuak, ukenduak, artilezko lanak, kuartzozko olioak, kortseak, zeramika, bisuteria eta askoz gehiago.