Jardunaldiak antolatzearen zergatia azaldu dute, eta bi arrazoi nagusi azpimarratu: "Batetik, garai inportantea bizitzen ari gara. Gure bailaran, Euskal Herrian eta munduan aldaketa handiak gertatzen ari dira eta gertatuko dira. Herritarrei, izango diren trantsizioei norabide egokian erantzun beharra dugu: energia, elikadura, zaintza krisia, merkataritza, gazteen emantzipazioa, osasungintza… Horiek eragingo dutenez, ongizate maila hobetzean eragin beharko dugu. Bestetik, azken zortzi urte hauetan Udalaren bilakaera oso kezkagarria izan da, atzerapauso nabarmena. Udal Gobernua inongo planik gabe egon da eta, haren kezka nagusia irudia izan den bitartean, herri logela fenomenoa areagotu egin da. Horren aurrean, herri egitasmo sendoa behar dugu".
Herriaren ekarpen bila
Zapatuan modu kolektiboan iritziak elkartrukatzea da asmoa, eta lau gai nagusitan sakonduko dute: energia, elikadura eta ingurugiroa; euskara, kultura eta kirola; zaintza eta ongizatea; eta gazteria. "Herri osorako abiapuntua martxan jarri nahi dugu, eskoriatzarren beharrak gizarteratu eta herri eztabaida piztu. Abenduaren 3a guretzat egun oso berezia da, Euskararen Egunak balio berezia duelako. Gainera, euskararen erabilpenaren inguruko datuek kezka handia sortzen digute. Horretaz ere jardungo dugu…".
